آئی ایس ڈی پی، علماء کیلئے سوفٹوئیر ڈویلپمنٹ سیکھنے کا نادر موقع || ISDP, ٰgolden opportunity for Ulama to become a software developer

سوفٹوئرڈویلپمنٹ کیا ہے؟؟

 ٹچ سکرین پہ مزے سے ہاتھ پھیرتے ہوئے کبھی آپ نے سوچا ھے کہ آپ کا لیپ ٹاپ/موبائل آپ کی انگلی کے اشارے پہ کیونکر ناچتا ہے؟ جی ہاں اس کے پیچھے حضرت انسان کی دی گئی ھدایات کارفرما ہیں، ان ھدایات کو پروگرامز کہتے ہیں۔ یہی پروگرامز سوفٹ وئیرز کی تقدیر ھوتے ہیں چنانچہ حضرت انسان اپنی مرضی کی تقدیر لکھ کر ان سوفٹ وئیرز سے مزے مزے کے کام لیتے ہیں، اسے سوفٹ وئیر ڈویلپمنٹ کہا جاتا ہے۔

 آئی ایس ڈی پی کیا ہے؟

علمائے کرام کوکمپیوٹر سائنس سے رو شناس کرانے والا ایک ادارہ ھے ۔ یہ ادارہ ایک سالہ کورس کا انعقاد کرتا ھے جس میں ڈیٹابیس ، ویب ڈویلپمنٹ اور اینڈرائڈ ایپس کی قابل قدر تربیت دی جاتی ھے۔ یہ کورس فی الحال جامعہ اشرفیہ  لاہورمیں ھوتا ھے۔ اساتذہ کرام میں "کامسیٹس یونیورسٹی اسلام آباد" اور پنجاب یونیورسٹی کے اساتذہ کرام اوردیگر ماھرین شامل ھیں مزید تفصیل کیلئے یہاں کلک کریں

ISDPکی ویب سائٹ کی پیشانی، داخلہ فارم وغیرہ یہیں موجود ہے

:مقاصد و اھداف

علماء کرام کا معاشی استحکام:

دین اسلام انسان کے خود کفیل ہونے کی حوصلہ افزائی کرتا ہے, علماۓ کرام کو اس پر خصوصی طور پر توجہ دینا ہوگی, تاکہ وہ کسی بھی قسم کے معاشی یا معاشرتی دباؤ سے آزاد ہو کر دین کی نشر و اشاعت میں اپنا کردار ادا کر سکیں, حضرت عمر رضی اللہ عنہ کا ارشاد ہے: یا معشر القراء ارفعوا رؤوسکم فقد وضح لکم الطریق, استبقوا فی الخیرات و لا تکونوا عیالا علی الناس, جب علما خودکفیل ہوں گے تو معاشرے میں ان کی حیثیت مزید مضبوط ہو گی

جدید مسائل کی تفہیم:

ٹیکنالوجی کے استعمال سے زندگی جتنی آسان ہورہی ہے, مسائل کی شرعی تکییف اتنی ہی مشکل ہورہی ہے. آئندہ زمانے میں ایمرجنگ ٹیکنالوجیز کی بنا پر یہ مسائل مزید پیچیدہ ہو جائیں گے, ان کی بہتر تفہیم کیلئے ٹیکنالوجی کو سمجھنا ضروری ہے

عملی دعوت:

صنعتی دنیا میں اخلاق نبوی صلی اللہ علیہ و سلم کے حامل, علماۓ کرام کی تعداد آٹے میں نمک کے برابر ہے. ضرورت اس بات کی ہے کہ صحابہ کرام علیہم الرضوان کی سنت پر عمل کرتے ہوئے چند علمائےکرام بھی ٹیکنالوجیز سیکھیں اور صنعتی دنیا میں اخلاق نبوی صلی اللہ علیہ و سلم کی عملی تصویر پیش کرنے کا فریضہ سر انجام دیں 

جدید حلقوں تک رسائی:

ہمارا قومی المیہ ہے کہ ہم علمی و فکری طور پر دو مختلف طبقوں میں تقسیم ہیں. مسٹر دین سے کورا ہے اور مولوی سائنس سے دور. یہی وجہ ہے کہ روایتی علمائے کرام کی رسائی جدید حلقوں تک نہ ہونے کے برابر ہے. ٹیکنالوجی سے واقفیت کے بعد علمائے کرام کو جدید حلقوں تک دین کی بات مؤثر انداز میں پہنچانے کا موقع ملے گا.

احساس کمتری سے نجات:

نئی ٹیکنالوجیز سے ناواقفیت اور معاشرے کے امتیازی سلوک کی بنا پر ہمارے فضلائے  کرام اکثر احساس کمتری کا شکار ہوتے ہیں. اس کورس کے بعد ان شاءاللہ یہ احساس کمتری، اعتماد اور جذبہ شکر میں تبدیل ہو جاۓ گی. آپ حیران ہوں گے کہ درس نظامی میں شامل منطق ایسے ثانوی علوم بھی کمپیوٹر سائنس اور جدید ذھنیت کو سمجھنے کیلئے کس قدر مضبوط بنیاد فراھم کرتے ھیں

شرائط صحت:

فقہائے کرام نے اس کورس کی صحت کی سات شرائط بیان کی ہیں

مسلمان ہونا: 

اس کورس کیلئے کسی خاص مکتب فکر سے تعلق رکھنا ضروری نہیں, صرف مسلمان ہونا کافی ہے

بالغ یا مراھق ہونا:

جو حضرات درس نظامی کر چکے ہیں یا اس سال دورہ حدیث کررہے ہیں, صرف وہ اس کورس میں شریک ہو سکتے ہیں

مقیم ہونا:

یہ کورس صرف مقیمین(بالمشافہ پڑھنے والے حضرات) کیلئے ہے, آن لائن پڑھنے والے حضرات اس کورس میں شرکت کے اھل نہیں

حدود حرم کا ہونا:

یہ کورس فی الحال صرف جامعہ اشرفیہ لاہور میں ہوتا ہے، لہذا آفاقی حضرات نیچے دئیے گئے لنک کے ذریعےمیقات پر پہنچیں اور احرام باندھ  لیں! لنک یہ رہا 

معتکف ہونا:

اس کورس کے ساتھ ساتھ آپ کو کوئی دوسرا کام کرنے کی اجازت/فرصت نہیں ملے گی, لہذا جامعہ میں داخل ہوتے وقت نفلی اعتکاف کی نیت فرما لیجئے گا

مستقل مزاج ہونا:

یہ شرط وجوبی ہے، اس کورس کے دوران قدم قدم پر اس کی ضرورت محسوس ہوگی، اس لئے  مذبذبین بین ذلک والی روش ترک کریں اور پورے شرح صدر کے ساتھ تشریف لائیں

رجسٹریشن کیلئے:

داخلہ فارم غور سے پڑھیں اور درست معلومات درج کرنے کے بعد جمع کروا دیں. رجسٹریشن مکمل ہو چکی ہے, اب آپ کو واٹس ایپ گروپ میں ایڈ کر لیا جائے گا, لہذا داخلہ فارم میں درست اور فعال فون نمبر لکھیں, داخلہ ٹیسٹ اور مزید تفصیلات سے اسی گروپ میں آگاہ کیا جاۓ گا داخلہ فارم پر کرنے کیلئے یہاں کلک کریں

رجسٹریشن کے بعد:

اپنی انگلش کی استعداد کو بہتر بنانے کی کوشش کرتے رہیں, اس کا بہترین طریقہ یہ ہے کہ برٹش کونسل کی مرتب کردہ مشقیں حل کریں. ان مشقوں میں روزمرہ انگلش بڑے آسان اور سادہ طریقے سے پیش کی گئی ہے. ہر مشق تقریبا ایک سے ڈیڑھ منٹ پر مشتمل ہے, اگر آپ روزانہ پندرہ منٹ بھی صرف کریں, تو کورس شروع ہونے تک اچھی خاصی استعداد پیدا کر لیں گے. مشقیں حل کرنے کیلئے یہاں  کلک کریں! 

حافظ محمدتنویرالحق 

آئی ایس ڈی پی کے بارے میں مزید معلومات کیلئے یہاں کلک کریں

تحریر سے متعلق اپنی تجاویز اور آرا سے کمنٹ باکس میں ضرور آگاہ فرمائیں جزاکم اللہ خیرا